அவனுக்கு வயது இருக்கிறது
அவனுக்கு வயிறும் இருக்கிறது
வெக்கம் மானம்
சூடுடன் சேர்ந்த பசியும்
கொஞ்சம் இருக்கிறது
வயிறுக்கு
என்ன தெரியும்
பசிப்பதைத் தவிர.?
மிஞ்சிப் போனால்
கிள்ளி ரசிக்கத் தெரியும்
உள்ளிருந்து சிரிக்கத் தெரியும்.
அவன் யாரையும்
குற்றம் சொல்லமாட்டான்
குறையும் சொல்லமாட்டான்
அவனுக்கு நன்றாகவே தெரியும்
தேவை இருக்கும்வரை
பசியும் இருக்குமென்று.
நிச்சயம் அவனால்
புலியாக இருக்க முடியாது,
பசித்தால்
புல்லையும் கல்லையும்
புசித்தே ஆக வேண்டுமென்பதில்
உறுதியாக இருக்கும்போது.
பசி வந்தால்
பத்து மட்டுமல்ல
பதினொன்றாவதாக இருப்பதும்
பறக்கும்.
பறப்பதற்கு
இப்போதைய தேவை
இறக்கையல்ல,
இரைப்பை நிறைய உணவு.
