ஏய்... நிஞ்சா, டோராக்களே
டிவியில் விளையாடும் உங்களை
என்றாவது ஒருநாள்
வீதிக்கு இழுத்துச் சென்று
விளையாடப் போகிறாள்
எச்சரிக்கையாக இருங்கள்!
*
இரவினில் ஆட்டம்
பகலினில் தூக்கம்
என்பதெல்லாம்
அவளுக்குக் கைவந்த கலை!
*
“ஒண்ணு மூணு ஆறு” என்றபடி
தப்புத் தப்பாக
மழலை மொழியில்
மழைத்துளியை எண்ணுகிறாள்.
சந்தோஷமாகச் சிதறுகிறது
ஏகப்பட்ட மழைத்துளிகள்!
*
“அப்பா... இந்தப் பாப்பா அழகா இருக்குல்ல”
என்றவாறு
கண்ணாடி முன் நின்றுகொண்டு
தலை சாய்க்கிறாள்
தெரிகிறது தெய்வீகச் சாயல்!
*
“அப்பா... A for Appleதானே?”
என்ற மகளிடம்
அல்ல மகளே
உன் அப்பன் தமிழன்
“ஆ என்றால் ஆப்பிள்” என்றேன்.
“ஆப்பிள் தமிழ் இல்லப்பா?” என்றவாறு
தலையில் கொட்டுகிறாள்
தமிழ் இனிக்கிறது!
*
கண்ணை மூடியபடி
எதிரில் ஒளிந்துகொண்டு
வீடு முழுக்கத் தேடச் சொல்கிறாள்
‘பாப்பாவைக் காணோமே’ என்றபடி
உலகம் சுற்றிவருகிறேன்.
*
வீட்டின்
பத்துக்குப் பத்து அறைக்குள்
பல மைல்கள் நடக்கிறாள்.
ஓடப் பழகிவிட்டது
நடை பயிலும் வண்டி!
*
முத்தமொன்று கொடுத்து
திருப்பி வாங்கிவிட்டு
“அப்பா... எச்சிப்பா"
எனத் துடைப்பதுதான்
மகளதிகாரத்தின் உச்சம்!
