இப்போது மட்டுமல்ல
எப்போதும்
இரட்டை அர்த்தங்களில்
முதல் அர்த்தத்தை
முந்திக் கொண்டு,
இரண்டாவது அர்த்தம் தான்
முதலில் யூகிக்கப் படுகிறது..!!
இரவு பெய்த மழை
மழை பெய்த இரவு,
நனைத்து விட்டுப் போனது
நனைந்த இடம் மட்டுமல்ல
நனையாத இடமும் தான் ..!!
வாசல் வரை வரும் நிலா,
நள்ளிரவில் வீட்டிற்குள்
அழைப்பதை விட
விடாப்பிடியாய்
இழுப்பதையே விரும்புகிறது..!!
ஆசை இன்னும் வேகவில்லை,
கடைசியில் மிஞ்சிய
வெப்ப அளவு கூட
குளிர்ந்து விட்டது,
வெந்து விட்டதா என அறியாமலே
ஆசையும் தீர்ந்து விட்டது..!
இன்னும் அங்கு
செல்வதற்கான வழி
கிடைத்த பாடில்லை,
அதற்குள் தப்பிக்க வழியின்றி
அத்தனை வழிகளும்
வலியுடன் மூடப்படுகிறது..!!!
அதைப் பற்றிய ரகசியங்களை
எங்கே பேசுவது,?
எவ்வளவு பேசுவது,?
எப்படி பேசுவது.?
பேசி ஒன்றும் ஆகப்போவதில்லை,
பேசாமல் இருந்தாலும்
ரகசியம் காக்கப்படுவதில்லை..!!
என்னடா கொடுமையிது
அர்த்தமில்லாமல் இப்படி
இரண்டு ஒற்றை அர்த்தத்தில்
எழுத வேண்டியிருக்கிறது
இந்தக் கவிதையை...!!!
