நிலாக்கள் எல்லாம்
என்ன பாவம் செய்ததோ..?
காதலிகளை
வர்ணித்து வர்ணித்தே
வறண்டு விட்டது..!!
ஒற்றை நிலவுக்கே
இத்தனை போராட்டம் இங்கே..!!
மலரைப் போல அழகு,
மலரைப் போல சிரிப்பு,
மலரைப் போல வெக்கம்,
எதற்கெடுத்தாலும்
மலரையே சொன்னால்
மலர் என்ன செய்யும்..??
மலருக்கும் மனசாட்சி இருக்குமே..??
மயிலாக நடனம்,
குயிலாக பேச்சு,
அன்னப் பறவையாக நடை,
மானாக ஓட்டம் என
ஒரு விலங்கையும்
விட்டு வைக்கவில்லை..!!
காதலியைப் பற்றி சொல்ல
காட்டில் தான் அலைய வேண்டுமோ..??
காதலியை
இன்னும் கொஞ்சம்
ஆடம்பரமாக குளிர வைக்க,
தேவதைகளை
வம்புக்கு இழுத்து,
கடல் கன்னிகள் வரை
கற்பனை செய்து
மானத்தை விட்டு
பொய் சொல்வது நியாயமா ..??
பறப்பன,
நடப்பன,
ஊர்வன என
ஓரறிவு முதல்
ஐந்தறிவு வரை
தின்று தீர்த்த
அசைவக் காதலன்
சைவக் காதலியை
அவைகளுடன்
எப்படி ஒப்பிட முடியும்...???
காதலை அலங்கரித்து சொல்ல
மனித இனத்தில் பஞ்சமோ..?
காதலியை ஒப்பனை செய்ய
அழகு ஒப்பீடு அவசியமோ..?
வர்ணனை இல்லை என்றால்
காதலும் காதலியும்
என்னாகுமோ...??
