வெஸ்டர்ன் டாய்லெட்! - Mano Red

விடிந்தும் விடியாத பொழுதுகளில்
காலைக் கடன் கழிக்க
மறைவிடம் தேடி ஓடும்
எம் ஊர்க்காரர்களில்,
மேற்கத்திய கலாசாரம்
அனுபவிக்கும்
முதல் தலைமுறையாகிய நாங்கள்
ஒவ்வொருமுறை கழிவுகளை
ஃப்ளஷ் செய்யும்போதும்
பரம்பரை நினைவுகளை
படிமங்களாக்கப் பழகிக்கொள்கிறோம்.

மிஞ்சி இருப்பது... Mano Red

அந்த மிருகத்திடம் 
இன்றும் தோல்விதான்.
நாய் உறங்கி நரி உறங்கி
ஊர் உறங்கியும்
உறங்காத உள்ளத்திற்குள்
கூடுவிட்டுக் கூடு பாய
இருட்டுக்குள் தவழ்ந்து வந்தது.
அனுமதி கேட்காமல்
அதிரப் புகுந்து
மாயத்திரையால்
நிஜத்தை மறைத்து
யுத்தம் தொடங்கியது.
எல்லாம் முடிந்தும்
மிஞ்சி இருக்கும் தனிமையை
பந்தயப் பொருளாக்கி
அது ஆடிய சூதாட்டத்தில்
உயிரைப் பணயம் கேட்ட
அந்த வசியக் குரல் மட்டும்
இன்னும் கேட்டுக்கொண்டே இருக்கிறது.

காதல் கொஞ்சம் தூக்கல்! -Mano Red

என் காதல் வரிகளெல்லாம்
அழத் தெரிந்தவை
காத்திருந்தே
கண்ணீரைத் தத்தெடுத்தவை.

பேனா பிடித்தெழுதுகையில்
நகக் கண்ணில் நுழைந்து
அகக் கண்ணைத் துளைப்பதுபோல
வலி மிகுந்தவை.

இது போன்ற வேதனைகளின்
வேர் நுனியிலிருந்து
உருவிய வரிகளை
வடிகட்டித்தான்
பலமுறை உன் இதயத்தின்
நாக்கை நனைத்திருக்கிறேன்.

படித்து முடித்த பிறகு
“இன்னும் கொஞ்சம் காதல் ரசம்
தூக்கலாக இருந்தால்
நன்றாக இருக்குமே” என்று
நீ சொல்லும்போதெல்லாம்
‘ரத்தம் பிழிந்தே வரிகளை
வார்த்திருக்கிறேன்
முகர்ந்து பார்’ என்று சொல்லி
உன்னை அழ வைக்க
இன்னொரு இதயம் வேண்டுமடி! 

ஆதார் கார்டிலும் அழகி! - Mano Red

அவள் அணிந்துவரும் 
ஆடை நிறம் பொருத்து
கண்களின் நிறம் மாறுவதால்
நம்புங்கள் அவள் அழகியென.
தந்தையின் விரல் பிடித்து
அதிகம் நடந்தவள்போலும்
வேடிக்கை பார்க்கும் அழகின்
ஒரு ஓர விளிம்பில்
நம்பச் செய்வாள் அழகியென.
பார்க்காதபோது பார்க்கும் கள்ளப்பார்வையை
காட்சிப்பிழையுடன் சேர்க்காமலிருந்தால்
நம்பிவிடுவீர்கள் அவள் அழகியென.
ஒப்பனைகள் இல்லாத அழகுடன்
ஏதோ ஒப்பந்தம் செய்திருக்கிறாள்
திகைத்தபின் நிச்சயமாக நம்புவீர்கள் அவள் அழகியென.
எல்லாவற்றையும் விட
ஆதார் கார்டிலும் அழகாக இருப்பவளை
எப்படி நம்பாமல் போவீர்கள் அழகியென!