ஞாயிறு உளறல் 12 - Mano Red

அது ஒரு மங்கலான மாலைப்பொழுது. அதாவது வெயில் மறைந்தும் மறையாமலும், இருள் வந்தும் வராமலும் இருக்கிற ஆஃபாயில்தனமான நேரம். பெண் ஒருத்தி (வயது முக்கியமில்லை) மெடிக்கல் ஷாப்க்கு வந்திருந்தாள். அந்தக் கடைக்கு அவர் வாடிக்கையாளர் என்பது இருவரது பார்வையிலும் தெரிந்தது. அதனால்தான் வரிசை நாகரிகம் தெரியாமல் முன்னால் காத்திருப்பவர்கள் பற்றிய கவலையின்றி வந்தவுடன் அவரும் கேட்க, கேட்ட உடன் மருந்துக் கடைக்காரரும் எடுத்துக் கொடுக்க அருகில் யாரோ பல் கடிக்கும் சத்தம் கேட்டது. (இதுவே குழாயடியாகவோ, ரேஷன் கடையாகவோ இருந்திருந்தால் நடக்கிற கதையே வேறு)

காய்ச்சல் என நினைக்கிறேன். இருமிக் கொண்டும், மூக்கை உறிஞ்சி ஒரு விரலால் மூக்கை இழுவியபடியும் மருந்து கேட்டாள். மருந்துக் கடைக்காரனும் ரொம்ப வேகமாக மாத்திரையை வெட்டி எடுத்து கவரில் போட்டு கொடுத்தான். இதற்கிடையில் அவள் தன்னுடைய எடையை மிஷினில் சரிபார்த்துக் கொண்டாள். அவளை அனுப்பி விடுவதில் ரொம்ப வேகமாக கடைக்காரன் செயல்பட்டது அனிச்சையாக இருந்தது.

போன வேகத்தில் திரும்பி வந்த அவள் "என்ன மாத்திரை இது? புதுசா எதயோ கொடுத்து என்னையக் கொல்ல பாக்குறீங்களா?" என்று ஏளனத்துடன் கத்த, மாத்திரைகளை வாங்கிப் பார்த்த கடைக்காரருக்கு என் ஞாபகம் வந்தது.

"இவ்வளவு நேரம் இவன் ஏன் அங்க சும்மா நிக்கிறான்" னு உங்களுக்கு சந்தேகம் வந்திருக்குமே? எனக்கும் வந்துச்சு. நான் கேட்ட மாத்திரைகளை தேடிக் கொண்டிருந்த இடைவெளியில் அவள் வந்ததால் என்னை ஓரம்கட்டிவிட்டார்கள். நானும் பெருந்தன்மையாக விலகிக் கொண்டேன். நடுவில் பல்லைக் கடித்த சத்தம் கேட்டிருக்குமே அது நான்தான். எனக்கான மாத்திரைகளைத்தான் அவளிடம் கொடுத்துவிட்டு திட்டு வாங்கினார். இப்போது சரியான மாத்திரைகளைக் கொடுத்து அவளை அனுப்பிவிட்டு சோகமே உருவாக எனக்கு மாத்திரைகள் கொடுத்தார்.

"யோவ்... மளிகைக் கடைக்காரன் பொறுப்பில்லாம இருக்கலாம் ஆனா மருந்துக் கடைக்காரன் பொறுப்பில்லாம இருக்கலாமா? ஏன்னா உயிர் ஒண்ணும் --- இல்ல"😎 (பெரிய Punchஆ இருக்கோ?)

- Mano Red / 22.10.17

சாட்டர்டே நைட் - Mano Red

கேமராக் கண்கள் பொருத்தப்பட்ட அந்த 253 வயது இளம் ஜோடியை ஹைபிரிட் கிளப்பின் 15அடி வாட்ச்மேன் உள்ளே அனுமதிக்கவில்லை. ‘இன்று மூக்கில் பச்சை ரத்தம் ஒழுகுபவர்களுக்கு மட்டுமே அனுமதி’ என்ற டிஜிட்டல் போர்டு வாசலில் வைக்கப்பட்டு இருந்தது. (ஒவ்வொரு நாளும் மூக்கில் இருந்து ஒவ்வொரு கலரில் ரத்தம் ஒழுகும் என்பது எக்ஸ்ட்ரா தகவல்).

எப்படியாவது உள்ளே நுழைந்து சாட்டர்டை இரவைக் கொண்டாடத் துடித்த அந்த ஜோடி கிளப்பின் கொல்லைப் புறத்தில் நெடிதுயர்ந்து வளர்ந்து படர்ந்திருந்த பிளாஸ்டிக் அரச மரத்தின் மறைவில் நின்றபடி யோசித்தது. ஒரு யுகமாக அழியாமல் இருந்த பிளாஸ்டிக் போதி மரத்தின் போதை தலைக்கேறியதும் அவர்களின் மெடுலா ஆப்லகேட்டாவில் ஐடியா பிறந்தது. அவளின் முதுகெலும்பைக் கீறினால் வரும் நீல ரத்தத்தையும், அவனின் சிறுநீரகத்தைக் கீறினால் வரும் மஞ்சள் ரத்தத்தையும் ஒன்றுடன் ஒன்று முடிச்சுப் போட்டால் இருவரது மூக்கிலும் பச்சை ரத்தம் ஒழுகும் என்பது உறுதியான பிறகு துள்ளிக் குதித்து முத்தமிட்டுக் கொண்டனர்.

முத்தமிட்டார்கள் என்ற பெயரில் மாறி மாறி உயிரை உறிஞ்சியதால் பசி அவர்களின் வயிற்றைக் கிள்ளியது. முன்னேற்பாடாக தூக்குவாளியில் கொண்டு வந்திருந்த புளியோதரையையும், பச்சை வெங்காயத்தையும் கடித்து இரவு டின்னரை முடித்தனர். ஆடைகளைச் சரி செய்து ஃபுல் மேக்கப்புடன் 15அடி வாட்ச்மேன் முன் பச்சை ரத்தம் ஒழுக ஒழுக நின்றபோது அந்த ஜோடியை ஏற, இறங்கப் பார்த்தார் வாட்ச்மேன். ’உள்ளே போகலாம்’ என்பதற்கான சிலிக்கான் சில்லு ஐடி ஒன்றைக் கையில் பொருத்திவிட்டு அந்த ஜோடியிடம் வாட்ச்மேன் கேட்டார் ‘உங்களுக்கும் சொந்த ஊர் தூத்துக்குடியா?’

- Mano Red /21.10.17