அவர்களைத் தவிர
கூராகத் தான் இருந்தது
அங்கிருந்த அத்தனை கத்திகளும்..!!
கவிச்சி நாற்றம் அங்கு மட்டுமல்ல
அங்கு வந்திருந்த
அத்தனை மனதிலும்..!!
சொட்டுவிடாமல் இரத்தத்தை
பாத்திரம் நிரப்பிய
அவனைப் பார்க்கையில்,
இன இரத்தம் குடித்த
சர்வாதிகாரிகளின் சாயல்
வந்து வந்து போயிருந்தது...!!
கொன்றால் பாவம்
தின்றால் போய்விடுமென
நியாயம் பேசுகிறான்,
இரக்கமற்றவர்களின்
இறைத் தூதுவனாக
இவனையே நியமிக்கலாம்...!
அவனும் நிச்சயம் சொத்துக்காக
குடும்ப உறவை
பங்கு போட்டிருப்பான்,
பக்குவம் தெரிந்தது
பாகம் பாகமாய்
பங்கு வைக்க
கை நடுங்காமல் அவனிருந்தது..!!
மனித இன அநீதிகளுக்கு எதிராக
குரல் கொடுத்த
தலைவனின் நாக்கு
சுவைக்காக அலையும் போது,
இன்னொரு இனத்தின்
நாக்கு அங்கே பிடுங்கப்பட்டிருந்தது..!!
தூக்குவாளி ஏந்தி
காத்துக் கொண்டிருக்கும்
மனித மிருகங்களுக்கு
என்ன கவலை...??
தூக்கில் ஏற்றப்பட்டது
வாய் பேசாத இனம் தானே..!!
வைட்டமின் சத்துக்காக
இன்னொரு இனத்தின்
வயிற்றில் அடித்து
வயிறை நிரப்பும் முன்,
ஈவு இரக்கங்களைப் பற்றி
தயவுசெய்து யாரும் பேசி
காலம் கழிக்க வேண்டாம்...!
