காதல் கொஞ்சம் தூக்கல்! -Mano Red

என் காதல் வரிகளெல்லாம்
அழத் தெரிந்தவை
காத்திருந்தே
கண்ணீரைத் தத்தெடுத்தவை.

பேனா பிடித்தெழுதுகையில்
நகக் கண்ணில் நுழைந்து
அகக் கண்ணைத் துளைப்பதுபோல
வலி மிகுந்தவை.

இது போன்ற வேதனைகளின்
வேர் நுனியிலிருந்து
உருவிய வரிகளை
வடிகட்டித்தான்
பலமுறை உன் இதயத்தின்
நாக்கை நனைத்திருக்கிறேன்.

படித்து முடித்த பிறகு
“இன்னும் கொஞ்சம் காதல் ரசம்
தூக்கலாக இருந்தால்
நன்றாக இருக்குமே” என்று
நீ சொல்லும்போதெல்லாம்
‘ரத்தம் பிழிந்தே வரிகளை
வார்த்திருக்கிறேன்
முகர்ந்து பார்’ என்று சொல்லி
உன்னை அழ வைக்க
இன்னொரு இதயம் வேண்டுமடி!