அவள் அணிந்துவரும்
ஆடை நிறம் பொருத்து
கண்களின் நிறம் மாறுவதால்
நம்புங்கள் அவள் அழகியென.
தந்தையின் விரல் பிடித்து
அதிகம் நடந்தவள்போலும்
வேடிக்கை பார்க்கும் அழகின்
ஒரு ஓர விளிம்பில்
நம்பச் செய்வாள் அழகியென.
பார்க்காதபோது பார்க்கும் கள்ளப்பார்வையை
காட்சிப்பிழையுடன் சேர்க்காமலிருந்தால்
நம்பிவிடுவீர்கள் அவள் அழகியென.
ஒப்பனைகள் இல்லாத அழகுடன்
ஏதோ ஒப்பந்தம் செய்திருக்கிறாள்
திகைத்தபின் நிச்சயமாக நம்புவீர்கள் அவள் அழகியென.
எல்லாவற்றையும் விட
ஆதார் கார்டிலும் அழகாக இருப்பவளை
எப்படி நம்பாமல் போவீர்கள் அழகியென!
