கிரிக்கெட் ஸ்கோர் போர்டு
கண்டு பழகியவர்களுக்கு
இறந்தவர்களின் எண்ணிக்கை
குறிக்கப்பட்டிருந்த பலகை
விநோதமாகவே காட்சியளித்தது.
மூக்கு எது, வாய் எது என்றவாறு
கூழாகி நொறுங்கிக் காட்சியளிக்கும்
முகங்களைவிட
கதறி அழும் உறவுகளின் முகங்கள்
கண்ணீரை வேகமாக
ஊற்றெடுத்தன.
நாசியிலிருந்து
பிரிக்க முடியாத
பிணவாடையைக் கடந்து
சற்றும் நகர முடியவில்லை.
அந்த வாடை
உடையில் இருந்தா
உடம்பில் இருந்தா
காற்றில் இருந்தா
எங்கே ஒட்டிக்கொண்டிருக்கிறது
என்றும் தெரியவில்லை.
அலறல்களும் அழுகுரல்களும்
புலம்பல்களும் சாபங்களும்
காதில் தொடர்ந்து கேட்க,
மீண்டும் மீண்டும்
உரிமைகளைப் போராடி மீட்கவே
எங்களில் இன்னொருவன்
தீக்குளிக்க
தயாராகிக் கொண்டிருக்கிறான்!
வாழ்தலுக்கான அவசியம்
அதீதமாகச் சித்தரிக்கப்படும்போது,
அவன் செல்லும் இடமெல்லாம்
மரணமும் துரத்தி வருகிறது!
